Hoggaamiyaha Mucaaradka Venezuela Oo La Kulmay Militariga Dalkaasi




Hoggaamiyaha mucaaradka Venezuela Juan Guaidó ayaa kulamo qarsoodi ah la yeeshay saraakiisha militariga dalkaasi si ay garab uga siiyaan in xukunka laga tuuro madaxweyne Nicolás Maduro.

Hadalkan ayuu ku sheegay bayaan uu ku daabacay wargeyska New York Times.

Hoggaamiyaha mucaaradka ayaa isugu dhawaaqay inuu yahay madaxweynaha ku meel gaarka ah ee Venezuela.

Shiinaha iyo Ruushka ayaa taageeray madaxweynaha xilka hayo ee Maduro halka Mareykanka iyo dalal kale ay aqoonsadeen Guaidó.

Madaxweynaha Mareykanka ayaa shalay bartiisa Twitter-ka kusoo qoray inuu la hadlay hoggaamiyaha mucaaradka Venezuela isla markaasna uu taageerayo hoggaankiisa.

Xoghayaha arrimaha dibadda Britain Jeremy Hunt ayaa lagu wadaa inuu ugu baaqo Midowga Yurub inay cunaqabateyn kusoo roggaan hoggaamiyeyaal ka tirsan dowladda uu hoggaamiyo Maduro kaddib markii uu la hadlay Juan Guaidó.

 

Ku dhawaad 3 milyan oo qof ayaa ka qaxay dalkaVenezuela iyadoo dalkaasi ay ka taagan tahay dhibaato dhaqaale.